Ymarfer sgiliau cymorth cyntaf

Nawr bod eich grŵp wedi dysgu amrywiaeth o sgiliau cymorth cyntaf – gan gynnwys y gweithredoedd a’r camau allweddol i’w cymryd mewn amrywiaeth o sefyllfaoedd – mae’n bryd ymarfer yr hyn maen nhw wedi’i ddysgu.

Mae’r gweithgareddau hyn wedi’u cynllunio i’w defnyddio gyda dosbarth neu grŵp. Gall plant ymarfer amrywiaeth o sgiliau cymorth cyntaf i atgyfnerthu’r hyn maen nhw wedi’i ddysgu. Mae’r syniadau hyn am weithgareddau’n ddiddorol, yn rhyngweithiol ac yn ffordd ddefnyddiol o wirio cynnydd.

Mae'r syniadau hyn am weithgareddau ymarfer yn cynnwys:

Ymarfer y sgiliau

Bydd y dysgwyr yn ymarfer defnyddio’r sgiliau maen nhw wedi’u dysgu drwy feimio’r camau neu eu hymarfer ar fanicin. Anogwch y dysgwyr i wneud hyn mewn parau a gwylio a chefnogi ei gilydd er mwyn gwneud yn siŵr eu bod yn dilyn y camau’n gywir.

Eitemau cymorth cyntaf pob dydd

Dangoswch ddetholiad o eitemau pob dydd i'r dysgwyr y gallen nhw ddod o hyd iddyn nhw o gwmpas eu tŷ neu yn eu meddiant a gofynnwch iddyn nhw baru’r eitem â’r sgìl a disgrifio sut bydden nhw’n ei defnyddio i helpu.

Chwarae rôl

Mewn grwpiau bach, anogwch y dysgwyr i ddarllen drwy’r detholiad o gardiau chwarae rôl ar bob un o’r tudalennau sgiliau cymorth cyntaf a thrafod y gwahanol bobl dan sylw, sut gwnaethon nhw helpu a sut gallen nhw helpu’n wahanol yn y dyfodol. Defnyddiwch ddetholiad o weithgareddau eraill i berfformio’r gweithgareddau chwarae rôl hyn ac ymchwilio i’r adegau allweddol yn y stori.